Askja hlaut viðurkenningu fyrir faglega móttöku og þjálfun iðnnema
Verðlaunaafhending Nemastofu atvinnulífsins til fyrirmyndafyrirtækja fór fram laugardaginn 3. febrúar sl. samhliða nýsveinahátið Iðnaðarmannafélagsins í Reykjavík.
Verðlaunin eru veitt fyrirtækjum og iðnmeisturum sem hafa náð góðum árangri í þjálfun og kennslu nema á vinnustað og fyrir framlag þeirra til starfsmenntunar í landinu.
Berglind Bergþórsdóttir, mannauðsstjóri Öskju, tók við viðurkenningu fyrir hönd Öskju á fjölmennri hátíð Iðnaðarmannafélagsins þar sem forseti Íslands afhenti hópi sveina viðurkenningar, sem og 4 fyrirtækjum verðlaun fyrir móttöku og þjálfun iðnnema.
Hin fyrirtækin eru: Marel, Snyrtistofa Ágústu og Hasar.
"Við erum gríðarlega stolt af því að vera eitt af fjórum fyrirtækjum sem voru heiðruð af Nemastofu. Hjá okkur starfa í dag um 60 bifvélavirkjar á þremur best búnu bifreiðaverkstæðum landsins, en þrír af hverjum fjórum nemum sem hafa hlotið starfsþjálfun hjá Öskju undanfarin ár starfa hjá okkur í dag," sagði Berglind Bergþórsdóttir, mannauðsstjóri Öskju.
Sjá kynningarmyndband Nemastofu af Öskju hér fyrir neðan.
