14. sept. 2021

Askja og bíla­framleiðandinn smart hefja samstarf

Á IAA Mobility 2021 bílasýningunni í Munich, frumsýndi smart Concept #1 rafbílinn en um er að ræða rafmagnsbíl í flokki borgarjepplinga.

smart

Bíllinn sem er fjórhjóladrifinn er hannaður af Mercedes-Benz og framleiddur í nýrri verksmiðju smart í Kína.

Concept #1 hefur vakið mikla athygli á sýningunni og var samningur Öskju og smart undirritaður á fyrsta degi sýningarinnar sem stendur yfir til 12. september. Bifreiðin sem kynnt var í Munich er nálægt endanlegri framleiðsluútfærslu þó svo að um hugmyndabíl sé að ræða.  

Margir kannast við vörumerkið smart en fyrstu smart bílarnir komu á markaðinn í Evrópu árið 1997. Nafnið smart varð til í samstarfi úraframleiðandans SWATCH og Mercedes-Benz og stendur fyrir Swatch Mercedes ART.   

Í lok árs 2019 var það tilkynnt að Mercedes-Benz og Geely einn stærsti bílaframleiðandi Kína myndu hefja samstarf í þróun og framleiðslu Smart. Félögin eiga sitthvor 50% hlutdeildina í fyrirtækinu og markmiðið er að ná fram því besta frá hvorum heimi. Þannig leggur Mercedes-Benz til hönnun að innan og utan en Geely leggur til framleiðsluþekkingu og verksmiðjur.  

Frá IAA Mobility 2021 bílasýningunni í Munich
Jónas Kári Eiríksson, forstöðumaður vörustýringar hjá Öskju, Jón Trausti Ólafsson, framkvæmdastjóri Öskju, Saskia Oboril-Klein frá smart, Dirk Adelmann forstjóri smart og Sarah Junghardt frá smart.
„Við hjá Öskju höfum unnið að þessu í þó nokkurn tíma og núna á þessum tímapunkti þegar samstarf Mercedes-Benz og Geely er að hefjast lá það fyrir að þetta væri rétti tíminn. Smart var fyrsti framleiðandi heims sem hættir alfarið framleiðslu hefðbundinna jarðefnaeldsneytisbíla og skipti alfarið yfir í rafbíla. Við munum frá árinu 2023 sjá nokkra nýja smart bíla koma á markaðinn og þeir eru stærri en við höfum áður séð. Okkur finnst því smart vera fullkomin vara fyrir Ísland. Rafknúinn bílaframleiðandi í hæsta gæðaflokki, sem býður upp á fjórhjóladrifinn borgarjeppling á góðu verði og með drægni sem telst til fyrirmyndar í þessum stærðarflokki auk þess að tengjanleiki við snjalltæki verður eins og best verður á kosið“.
Jón Trausti Ólafsson, framkvæmdastjóri Öskju
smart séður ofan frá
„Askja hefur verið frábær samstarfsaðili Mercedes-Benz í 18 ár á Íslandi. Það lá því strax fyrir að tilnefna Öskju sem sölu- og þjónustuaðila á Íslandi. Við erum full tilhlökkunar að fá að kynna smart fyrir Íslendingum og erum viss um að Ísland sem er meðal þeirra landa í Evrópu sem eru lengst komnir í rafbílavæðingunni mun taka okkur vel. Landið leggur mikla áherslu á sjálfbæra orkuframleiðslu og rafbílavæðing  mun flýta þeirri þróun enn frekar“.
Forstjóri smart í Evrópu, Dirk Adelmann skrifaði undir samkomulagið fyrir hönd fyrirtækisins.